മാര്‍ച്ച്‌ 26നു ഞങ്ങളുടെ റസിഡ്ന്റ്സ്‌ അസ്സോസിയേഷന്റെ ഗെറ്റ്‌ റ്റുഗദെര്‍.അതിന്റെ കാര്യങ്ങള്‍ക്ക്‌ വേണ്ടി നമ്മള്‍ ഓടി ചാടി നടന്നു. കുട്ടികള്‍ക്കുള്ള കളികളുടെ ചുമതലക്കാരന്‍ ഞാനായിരുന്നു. കുട്ടികളുടെ പാട്ടും കൂത്തും നടക്കുന്നതിനിടെ ഒരു സീനിയര്‍ കുട്ടി, വടംവലി വേണമെന്ന ആവശ്യവുമായി എന്റെ അടുക്കല്‍ വന്നു. വടംവലിക്ക്‌ വടം വേണ്ടെ.... ഈ അവസാന നിമിഷത്തില്‍ വടം നമ്മള്‍ എവിടുന്ന് സംഘടിപ്പിക്കുമെന്ന ചോദ്യത്തിനു ഉത്തരമെന്നോണം അവന്‍ വീട്ടിലേക്ക്‌ ഓടി. തിരികെ വന്നപ്പ്പോള്‍ അവന്റെ കൈയ്യില്‍ സാമാന്യം വണ്ണമുള്ള പ്ലാസ്റ്റിക്‌ കയര്‍. പ്ലാസ്റ്റിക്‌ കയര്‍ വെച്ച്‌ വടം വലിച്ചാല്‍ കൈ കീറുമെന്നതിനാല്‍ ടി കയറിനെ മാസ്കിംഗ്‌ റ്റെയിപ്പ്‌ വെച്ച്‌ നന്നായി ചുറ്റി സാമാന്യം ഭേദപ്പെട്ട സംരക്ഷണം നടത്തി. ഏതായാലും കുട്ടികള്‍ക്ക്‌ ഈ വടംവലി മാമാങ്കം നന്നായി ബോധിച്ചു. ആയതിനാല്‍ അവരുടെ മത്സരത്തിനു ശേഷം അവര്‍ തങ്ങളുടെ അമ്മമാരെ കൂടി കളത്തിലിറക്കി വടം വലിപ്പിച്ചു. അതിനു ശേഷം ഈ കയറില്‍ ആണുങ്ങളും മാറ്റുരയ്ക്കാന്‍ തീരുമാനിച്ചു. മത്സരം മുറുകി. ഒരു വശത്ത്‌ കല്യാണം കഴിച്ചവരും, മറു വശത്ത്‌ ക്രോണിക്ക്‌ ബാച്ചിലേഴ്സും. ഇന്ന് വരെ ഇങ്ങനെ ഒരു മത്സരത്തില്‍ പങ്കെടുത്ത്‌ പരിചയമില്ലാത്തതിനാല്‍, പല പല ഉപദേശങ്ങള്‍ കേട്ട്‌, പലരും അങ്ങോട്ടും ഇങ്ങോട്ടും മാറി, ഈ 56 കിലോ മാത്രം തൂക്കമുള്ള ഞാന്‍ കല്യാണം കഴിച്ചവരുടെ ഭാഗത്തുള്ള വടത്തിന്റെ ഏറ്റവും പിന്നില്‍ സ്ഥാനം പിടിച്ചു. പക്ഷെ എന്റെ മുന്‍പില്‍ നില്‍ക്കുന്നവരൊക്കെ ഒരു ക്വിന്‍റ്റലിനു ഒന്നോ രണ്ടോ കുറവുള്ളവരും. ഏതായാലും ഈ ക്വിന്‍റ്റല്‍സ്‌ ഉള്ള കാരണം വിജയം ഞങ്ങള്‍ക്ക്‌ തന്നെയെന്ന ആത്മവിശ്വാസത്തോടെ ഞാന്‍ ഏറ്റവും പിന്നില്‍ നിന്ന് ജയ ജയ മുഴക്കി.1..2...3...മത്സരം ആരംഭിച്ചു. മൂര്‍ദ്ധന്യാവസ്ഥയില്‍ ഞങ്ങളുടെ അടിത്തറയിളകുന്നതു പോലെ എനിക്ക്‌ തോന്നി. അണ്ണാന്‍ കുഞ്ഞിനും തന്നാലായതെന്ന കണക്കെ ഞാനും ഊന്നി വലിച്ചു. ഇട്ട പൊധിനോ!!! ഡീം!!! ദേ കിടക്കുന്നു എല്ലാം കൂടെ താഴെ!!!. ഈ ഉള്ളവന്റെ പുറത്ത്‌ എന്റെ ടീമിലെ മുഴുവന്‍ പേരും കിടക്കുന്നു. വീഴ്ച്ചയില്‍ ഞാന്‍ വലിയ വായില്‍ കാറി-എന്റെ കാലൊടിഞ്ഞേയെന്ന്. പക്ഷെ എന്റെ സ്വന്തം കാലിന്റെ പുറത്ത്‌ ഒരു 5-6 ക്വിന്റല്‍ ചാക്ക്‌, റ്റിപ്പര്‍ ലോറിയില്‍ നിന്ന് മറിച്ചിട്ട കണക്കെ കിടക്കുന്നു. കൂടല്‍മാണിക്ക്യ ക്ഷേത്രത്തിലെ ഗജകേസരിയുടെ ചവിട്ട്‌ കൊണ്ട്‌ അനുഭവം. പിന്നെ സാവകാശം ഒരോ ക്വിന്‍റ്റല്‍ ചാക്കുകള്‍ എഴുന്നേറ്റു, ചിലരെ എഴുന്നേല്‍പ്പിച്ചു. ഏറ്റവും ഒടുവില്‍ ഉള്ള ചാക്കും പൊങ്ങിയപ്പോള്‍ ഞാന്‍ എന്റെ സ്വന്തം കാലു കണ്ടു. എന്റെ വലതു കാലു ഒടിഞ്ഞു.സൂക്ഷമ പരിശോധനയില്‍ എന്റെ വലതു കാല്‍പത്തി നേരേ തിരിഞ്ഞിരിക്കുന്ന കാഴ്ച കണ്ടതും അവിടെ കരച്ചിലും ബഹളവും തുടങ്ങി. ഡോക്ടറന്മാരും, നേഴ്സന്മാരും, ലാബുകാരും ഒക്കെ അവിടെ ഉണ്ടായിരുന്നതിനാല്‍ പെട്ടന്നു തന്നെ എന്നെ പൊക്കി ആശുപത്രിയില്‍ എത്തിച്ചു. എന്നെ ലോഡ്‌ ചെയ്യുന്നതിനിടയില്‍ 2 ലാബ്‌ തൊഴിലാളികള്‍ക്ക്‌ തല കറങ്ങി. അവരെ കുറ്റം പറഞ്ഞിട്ട്‌ ഒരു കാര്യവുമില്ല. കാരണം അവര്‍ക്ക്‌ അവരുടെ 'നിത്യോപയോഗ സാധനങ്ങള്‍ക്ക്‌' ['മ"മൂ"ക'-ഇതു നമ്മുടെ മെഗാ സ്റ്റാര്‍ മമ്മൂക്ക അല്ല കേട്ടോ] അപ്പുറം ഒരു ലോകമില്ലല്ലോ. അങ്ങനെ ഞാന്‍ ആശുപത്രിയില്‍ ക്യാഷ്വാലിറ്റിയില്‍ എത്തി. ഒരു 5 മിനിട്ട്‌ കഴിഞ്ഞപ്പോള്‍ ഓര്‍ത്തോ ഡോക്ടര്‍ എത്തി. പിന്നെ ഡോക്ടര്‍ വന്ന് എന്റെ കാലില്‍ ഒന്ന് തൊട്ട്‌ വണങ്ങി. എന്നിട്ട് കാറിന്റെ ഗിയര്‍ ഒക്കെ മാറ്റുന്ന ലാഘവത്തോടെ കാല്‍പത്തി പിടിച്ച്‌ നേരെയിട്ടു. ഹെന്റെമ്മോ!!! മയിലെണ്ണക്കാരന്‍ ഈര്‍ക്കിലിയില്‍ മയിലെണ്ണ പുരട്ടി വളയ്ക്കുന്നത്‌ പല തവണ കണ്ടിട്ടുള്ള ഈ ഞാന്‍ ഡോക്ടറുടെ ഈ പ്രയോഗത്തില്‍ ഒരു മയിലെണ്ണയും പുരട്ടാതെ തന്നെ കാവടി പോലേ വളഞ്ഞ്‌ കുത്തി. ഏതായാലും എന്റെ നേരെയായ കാല് കണ്ടപ്പോള്‍ തന്നെ എന്റെ വേദന പകുതിയും പോയി.
കാലില്‍ സ്പ്‌ലിന്റും കെട്ടി എന്നെ മുറിയിലേക്ക്‌ മാറ്റി. പിറ്റേന്ന് ഓപ്പറേഷനും ഫിക്സ്‌ ചെയ്തു. ഓപ്പറേഷനു മുന്‍പായി എനിക്കു വിശാലമായ ഒരു ഗൗണ്‍ നേഴ്സ്‌ കൊണ്ടു തന്നു. വസ്ത്രങ്ങള്‍ മുഴുവനും ഊരി അവര്‍ തന്ന ഗൗണ്‍ ധരിച്ചപ്പോഴാണതിന്റെ പ്രശ്നം മനസ്സിലായത്‌. പുറകില്‍ ഒരു ചെറിയ കെട്ടു മാത്രം. ഞാന്‍ സൂക്ഷിച്ച്‌ കിടന്നില്ലായെങ്കില്‍ തന്റെ ‘പുറലോകം’ നാട്ടുകാരും, സഹപ്രവര്‍ത്തകരും കാണും. നശിച്ച ഗൗണിനെ മനസ്സില്‍ പ്രാകി, റെയമണ്ട്‌ സ്യൂട്ടിങ്ങില്‍ വരുന്ന അമിതാഭ്‌ ബച്ചനെ മനസ്സില്‍ ധ്യാനിച്ച്‌, ബോധം പോകുവോളം ആ പോസില്‍ കിടന്നു. ബോധം പോയ ശേഷം ഞാന്‍ ഏതു കിടപ്പിലായിരുന്നുവെന്ന് ഇതു വരെ അന്വേഷിച്ചതുമില്ല.
ഓപ്പറേഷന്‍ കഴിഞ്ഞ്‌ പിറ്റേന്ന് രാവിലെ എനിക്ക്‌ ഒരു മുള്ളാന്‍ മുട്ടല്‍. അങ്ങനെ ഭാര്യയുടെ സഹായത്തോടെ ഞാന്‍ റ്റോയ്‌ലെറ്റില്‍ പോയി. മൂത്രം ഒരു തുള്ളി വരുന്നില്ല. കൂനിന്മേല്‍ കുരു എന്നതു പോലെ ദൈവമേ...ഇനി വല്ല കിഡ്നി സ്റ്റോണോ മറ്റോ ആണോ...ഏതായാലും 4 മണിക്കൂറത്തെ അശ്രാന്ത പരിശ്രമത്തിനു ശേഷം ഞാന്‍ മൂത്രം ഒഴിച്ച്‌ പുറത്ത്‌ വന്നു. ഇതിനിടയില്‍ ഒരു 20 പ്രാവശ്യമെങ്കിലും എന്റെ ഭാര്യ കതകില്‍ തട്ടി എന്റെ സുരക്ഷ ഉറപ്പ്‌ വരുത്തി. വൈകിട്ട്‌ 5 മണിയായപ്പോള്‍ വീണ്ടും ഒരു മൂത്ര ശങ്ക. അന്നേരം മുറിയില്‍ ഡോക്ടേഴ്സും ഉണ്ട്. അവരോടു തന്റെ പ്രശനം അവതരിപ്പിച്ചപ്പോള്‍ അതും അനസ്തീഷ്യായുടെ സൈഡ്‌ എഫെക്റ്റാണെന്ന മറുപടി കിട്ടി. പിന്നെ അവിടെ ഉണ്ടായിരുന്ന ഒരു ഡോക്ടര്‍ എന്നെ താങ്ങി പിടിച്ച്‌ റ്റോയ്‌ലെറ്റില്‍ കൊണ്ട്‌ പോയി. ഡോക്ടര്‍ എന്റെ പുറകില്‍ നിന്നും മാറാതെ എന്നെ പിടിച്ച്‌ കൊണ്ട്‌ നിന്നപ്പോള്‍ ഞാന്‍ ഡോക്ടറോട്‌ എനിക്ക്‌ ഇങ്ങനെ നിന്ന് മൂത്രം ഒഴിക്കാന്‍ പറ്റില്ലായെന്ന് പറഞ്ഞപ്പോള്‍, ഡോക്ടര്‍ എന്റെ ചെവിയുടെ പുറകില്‍ ശൂ, ശൂൂൂൂ എന്ന് ശബ്ദം വെച്ച്‌ തന്നപ്പോള്‍ എന്റെ മൂത്രം എസ്‌.എസ്‌.എല്‍.സി പേപ്പര്‍ ചോര്‍ന്നതു പോലെ അറിയാതെ അങ്ങ്‌ ‘ചോര്‍ന്നു’ പോയി. കുറച്ച്‌ കഴിഞ്ഞ്‌ അനസ്തീഷ്യാ ഡോക്ടര്‍ വന്നു. ഡോക്ടര്‍ പറഞ്ഞു, “സെനു....സെനുവിന്റെ നാക്ക്‌ അനസ്തീഷ്യാ തന്നാലും അടങ്ങി കിടക്കില്ലായെന്ന സത്യം ഇന്നലെ മാത്രമാണെനിക്ക്‌ മനസ്സിലായത്‌”. ആ പ്രസ്താവന കേട്ട്‌ മുറിയില്ലുള്ള സുഹൃത്തുക്കള്‍ ചിരിച്ചുവെങ്കിലും എന്റെ ഉള്ളം കാളി. അബോധാവസ്ഥയില്‍ ഞാന്‍ വേണ്ടാത്തതെന്തെങ്കിലും വിളിച്ച്‌ പറഞ്ഞോ എന്ന് ചോദിച്ചപ്പോള്‍, എന്തൊക്കെയോ പറഞ്ഞു...നാക്ക്‌ കുഴഞ്ഞ കാരണം ഞങ്ങള്‍ക്ക്‌ ഒന്നും മനസ്സിലായില്ലയെന്ന് പറഞ്ഞപ്പോഴാണു എന്റെ അനസ്തീഷ്യയുടെ കെട്ട്‌ വിട്ടതു.
ആശുപത്രിയില്‍ നിന്നും വീട്ടിലേക്കുള്ള രംഗപ്രവേശം എന്റെ മക്കള്‍ക്ക്‌ നന്നേ രസിച്ചു. മോന്‍ വന്ന പാടേ എന്റെ വോക്കറുമെടുത്ത്‌ വീഡീയോ ഷൂട്ടിംഗ്‌ തുടങ്ങി. അവന്‍ ഷൂട്ടിംഗ്‌ എപ്പോഴോ നിര്‍ത്തിയപ്പോള്‍, വോക്കറുമെടുത്ത്‌ മോള്‍ എന്റെ കട്ടിലിന്റെ അടുത്ത്‌ തന്നെ സ്ഥാപിച്ചു. അതിനു ശേഷം അവള്‍ വോക്കറിനകത്ത്‌ കയറി നിന്ന്, ഒരു കൈ മുന്‍പിലേക്ക്‌ നീട്ടി എന്നോടായി പറഞ്ഞു, ഈ കോടതി മുന്‍പാകെ സത്യം മാത്രമേ ബോധിപ്പിക്കൂ..... ഈ പ്രകടനം അല്‍പ സമയത്തേക്ക്‌ എന്റെ വേദന ശമിപ്പിച്ചു.
സംഭവ ബഹുലമായ 40 ദിവസങ്ങള്‍ക്ക്‌ ശേഷം എന്റെ പ്ലാസ്റ്റര്‍ പൊട്ടിച്ചു. കഷ്ടം..പണ്ട്‌ ക്രിക്കറ്റ് സ്റ്റംബ്സിന്റെ വണ്ണം ഉണ്ടായിരുന്ന എന്റെ കാല് പ്ലാസ്റ്റര്‍ പൊട്ടിച്ചപ്പോള്‍, കേവലം ഓടക്കുഴലിന്റെ അത്രയും ആയിരിക്കുന്നു. ആ ഇനി വരുന്നതു പോലെ വരട്ടെ. ഏതായാലും ഇപ്പോള്‍ പിച്ച വെച്ച്‌ സ്വന്തം കാലില്‍ നില്‍ക്കാന്‍ പഠിച്ചു കൊണ്ടിരിക്കുന്നു. എന്റെ നടപ്പ്‌ കണ്ട്‌ കണ്ണില്‍ ചോരയില്ലാത്ത ഒരു സുഹൃത്തു ചോദിച്ചു- പണ്ടേ നിന്റെ നടപ്പ്‌ ശരിയല്ല. ഇനിയെങ്കിലും നിന്റെ ദുര്‍നടപ്പൊക്കെ മാറ്റി നന്നാവാന്‍ നോക്കടായെന്ന്....ആഹ!!! കളിയാക്കിക്കോ...അടി തെറ്റിയാല്‍ സെനുവും വീഴും മക്കളേ!!!
വടംവലി എന്ന ഒറ്റ ‘ഐഡിയ’ കാരണം മമ്മൂട്ടി, സുരേഷ്‌ ഗോപി എന്നിവരുടെ ഗ്ലാമര്‍ ഉണ്ടായിരുന്ന ഞാന്‍ ഇന്ന് ഏന്തിയും വലിഞ്ഞും നടക്കുന്നു. ആദിത്യാ ബിര്‍ല പറയുന്നത്‌ എത്ര സത്യമാ........An ‘ഐഡിയ’ can change your life….പിന്നെ എന്റെ ഈ ഏന്തലും, വലിച്ചിലും ‘നടക്കുമ്പോള്‍ മാത്രമേയുള്ളു’ എന്ന ഒറ്റ ആശ്വാസത്തിലാണു ഞാനിപ്പോള്‍.
Posts
35 comments:
Pandullavar parayunnathu ethra satyam.... Aana(Elephant) erendam edunnathu kandu muyalu kannu kannichitty valla karyom undo???? eppo onnu manasilayi pazhanjollil pathirilla...Ethra shramichalum Indransinu Mammootteede role aarelum kodukkumo??? ethayalum pazhanganji aavathe choodode vayikkanulla bhagyam kitty...
കാരണവന്മാര്‍ പറഞ്ഞിരുന്ന ഒരു സത്യമുണ്ട്...
“വയ്യാത്ത പട്ടി കയ്യാല കേറരുത്..”
(ഇനി ഞാന്‍ പട്ടി എന്നു വിളിച്ചെന്നെങ്ങും പറഞ്ഞേക്കല്ലേ...)
ദുര്‍നടപ്പിനെപ്പറ്റി പറഞ്ഞ ആ കണ്ണില്‍ ചോരയില്ലാത്തവനെ എത്ര പ്രശംസിച്ചാലും മതിയാവില്ല...
ഹൊ സെനു. പുലി വരുന്നേ എന്ന് പറഞ്ഞതു പോലെ ആണല്ലോ. വിവരത്തിന് സ്ക്രാപ്പും മറ്റും കണ്ടപ്പോള്‍ ഇതും ഏപ്രില്‍ ഫൂള്‍ പോലൊരു സെനു -നമ്പര്‍ ആണെന്ന് വിചാരിച്ച് എന്തിരോക്കെയോ തിരിച്ചു കളിയാക്കി എഴുതി. അപ്പം കാര്യം ആയിരുന്നല്ലേ. :-(
ഏതായാലും വരാനുള്ളതൊന്നും വഴിയില്‍ തങ്ങില്ല! പെട്ടന്ന് കാല് ശരിയാക്ക്. എന്നിട്ട് വേണം അടുത്ത വടം വലി സംഘടിപ്പിക്കാന്‍ :-)
അടിപൊളി എഴുത്ത്.
Kollamallo, ninakku ithrakku kazhivu undennu njan vicharichilla.
kandukandangirikkum janangale
kandillennu varuthunnathum bhavaan...
randu naalu dinam kondoruthane..
thandiletti nadathunnathum bhavaan.....
krishna krishna mukunda janardanaaa.....
എന്തായാലും ആ ഫോട്ടോ കൊള്ളാം .yes yourowner .... കാലോടിഞ്ഞത് കൊണ്ടു പതുക്കെ സമയം എടുത്തു എഴുതിയാല്‍ മതി അല്ലോ ..അല്ലെ ..... നല്ല പോസ്റ്റ് ... മാഷെ ..
Kollam kunjite kacheri
Kallakki..............
സേനു ചേട്ടാ..ഈ "കാലൊടിയല്‍ മാമാങ്കം" ഇത്ര രസകരമായി എഴുതാന്‍ പറ്റിയതിനു ഒരു "ഹാട്സ് ഓഫ് ".... കഴിഞ്ഞ കൊല്ലം ഈ സംഭവം എന്റെ വീട്ടിലും അരങ്ങേറി...കാലല്ല കൈ ആയിരുന്നു ഈനു മാത്രം.അതുകൊണ്ട് മൂപ്പര് ദുര്നടപ്പുകാരന്‍ ആയില്ല....
പക്ഷെ,ഒരു ഭാര്യയെന്ന നിലയില്‍ ഒരുപാടു സങ്കടപ്പെട്ടു...ദുര്നടപ്പ് മാറി വേഗം നന്നായി നടക്കാന്‍ പ്രാര്‍തിച്ചു കൊണ്ടു..
ഒരുകാര്യം പറയാന്‍ വിട്ടു : വീട്ടിലെ ആ "വിത്തിനു" (മോളടെ കാര്യമാ പറഞ്ഞതു മാഷേ..) വളവും ,വെള്ളവും കൊടുത്താല്‍ അച്ഛനെ വെട്ടിക്കുന്ന വടവൃക്ഷം ആവാന്‍ സാധ്യത ഉണ്ട്...ആ കോടതി കൂട്ടില്‍ കയറിയുള്ള നില്‍പ്പ് സൂപ്പര്‍.. !! അച്ഛനെ വെട്ടിക്കുന്ന നര്‍മ ബോധം ഉണ്ട് കക്ഷിക്ക്..
ബനാനാഹിസ്റ്ററി എന്ന പേര് മാറ്റി ഞൊണ്ടിപുരാണം എന്നാക്ക്.. പ്ലീസ് പ്ലീസ്..
എന്റെ ഒരു ആഗ്രഹമാ... :)
എന്തായാലും നഖത്തേല്‍ കൊള്ളാനുള്ളത് കാലിനു കൊണ്ടു...ഈശ്വരന്‍ സഹായിച്ചു :)
ഉമ്മാസ്..
നടക്കട്ടെ.. നടക്കട്ടേ.. [വേഗം നടക്കുമാറാകട്ടെ എന്നാട്ടോ...]
ശങ്ക വന്നിട്ടും പോകഞ്ഞതിനു കാരണം വൃക്ക മോഷണം വല്ലതും ആണോ? ഗോവയില്‍ സ്കാര്‍ലെട്ടിന്റെ ആന്തരാവയവങ്ങള്‍ ആരോ അടിച്ചുമാറ്റിയത് മാതിരി..
:( :) :( :)
??????????
ഇനിയെങ്കിലും പുതിയ ഐഡിയക്കു പുറകെ പോയി കൈയും കാലും ഒടിക്കല്ലേ?
ഹ ഹ!!
Hi Senu:
I don't know whether to laugh or cry when I read this. I can imagine how painful it would have been. You do have a very good positive attitude towards life. keep it up. I enjoyed reading the incident. A very humourous style.
ennalum kashtam thanne. Pavam Senu
Molly
ഹ ഹ.വീണതു കാരണം ഒരു പോസ്റ്റിനുള്ള വക കിട്ടീല്ലോ..ചിരിക്കാതിരിക്കാന്‍ വയ്യ സെനു.കാല് 180 ഡിഗ്രീ തിരിഞ്ഞോ..
സൂക്ഷിച്ചൊ ഇനി വടംവലിക്കു പോയാല്‍ അടുത്ത കാലായിരിക്കും തിരിയാന്‍ പോണേ..
40 ദിവസം പോയതറിഞ്ഞില്ല. വേഗം ഭേതമായല്ലോ ഭാഗ്യം. ഇനി നോക്കീം കണ്ടുമൊക്കെ നടന്നോളണം. :)
Senu
An Idea can change life, like anything!!!
enthaayaalum blog thakarthu. SSLC question paper chornnu enna prayogham kalakki. senu aa "Ottamooli" padichello..bhaaviyil prayojanam varum..
kale odinjathe enganey analleyyy.....:)
ഈ അനസ്തേഷിയ വളരെ അപകടമാണ്.എന്ടെ ഒരു കൂട്ടുകാരന്‍ ഓപ്പറേഷന്‍ കഴിഞു അബോധാവസ്ഥയില്‍ പല രഹസ്യങ്ങളും വിളിച്ചു പറഞ്ഞു.അതോടെ ഭാര്യ പിണങ്ങി പോയി.
ഇപ്പോ എല്ലാം ശരിയായില്ലേ?
qw_er_ty
എന്താ ഇതൊക്കെ ഞാന്‍ കാണാത്തേ??
അലക്കന്‍ എഴുത്തിഷ്ടാ. സ്റ്റമ്പിന്റെ വണ്ണമുള്ള കാല് ഓടക്കുഴലിന്റത്രക്കായിത്രേ!! :))
ഒരു കോഴിക്കാലനേ മറ്റൊരു കോഴിക്കാലന്റെ ദുഖം അറിയൂ ഡിയര്‍. ഞാന്‍ ജിമ്മിന് പോയി ജിമ്മിന് പോയി കൈക്കും നെഞ്ഞിനും മസില്‍ വപ്പിച്ചു. തോളില്‍ വെയ്റ്റ് കയറ്റി വച്ച് ഇരുന്നെണീറ്റാല്‍ കാലുമ്മത്തെ മസില്‍ നാഗത്തല പോലെ വരുംന്ന് ആശാന്‍ പറയും. നിര്‍ബന്ധിക്കും.
പക്ഷെ, എന്നെ കൊന്നാലും ഞാനത് ചെയ്യില്ല എന്ന് ഉറപ്പിച്ചിരുന്നു. പാമ്പുകടിക്കാനായിട്ട്, മസിലില്ലെങ്കില്‍ സഹിക്കും, പക്ഷെ, അത് കൊള്ളിത്തണ്ട് പോലെ ഒടിഞ്ഞങ്ങട് പോയാല്‍ എവിടെ പോയി നെലോളിക്കും?? അല്ലെങ്കില്‍ തന്നെ നടത്തിത്തൊനൊരു സ്പെല്ലിങ്ങ് മിസ്റ്റേക്കുണേയ്!
എനിവേ, തകര്‍പ്പന്‍ എഴുത്ത്.
അമ്മയ്ക്ക്‌ പ്രസവ വേദന. മോള്‍ക്ക്‌ വീണ വായന എന്ന് കേട്ടിട്ടുണ്ട്‌. ഞാന്‍ എന്റെ വീഴ്ച്ചയുടെ കദന കഥ പറഞ്ഞപ്പോള്‍ ഞാന്‍ കരുതി, ഈ കഥ പുറത്ത്‌ വരുമ്പോള്‍ ചിലപ്പോള്‍ എ.കെ.ബാലനെങ്കിലും രക്ഷപ്പെടുമെന്ന് [ബ്ലോഗറന്മാര്‍ കരഞ്ഞ്‌ ഡാം നിറഞ്ഞ്‌]പക്ഷെ മനുഷ്യത്വം എന്തെന്ന് അറിയാത്ത ഒരു പറ്റം ബ്ലോഗറന്മാരുടെ നടുവിലാണെന്ന നഗ്മ [നഗ്നയല്ല] സത്യം ഇപ്പ്പ്പോള്‍ എന്റെ കണ്ണ്‍ തുറപ്പിച്ചു.
ആന തീറ്റ എടുക്കുന്നത്‌ കണ്ട്‌ അണ്ണാന്‍ വായ പൊളിക്കരുതെന്ന് ഒരു അടൂര്‍കാരി ആദ്യ കമന്റ്‌ പാസ്സാക്കി.
മറ്റൊരു കൂട്ടുകാരന്‍ അതും ഒരു കല്യാണം കഴിക്കാത്ത ഒരു 52 വയസ്സുള്ള ഒരു ക്രോണിക്ക്‌ ബാച്ചിലര്‍ കമന്റി-വയ്യാത്ത പട്ടി, കയ്യാല കയറരുതെന്ന്. കമന്റ്‌ എനിക്ക്‌ ഇഷ്ടപ്പെട്ടു. പക്ഷെ ഇതു എനിക്കിട്ട്‌ വേണ്ടായിരുന്നു. ചുമ്മാതാണോ ലവന്‍ പെണ്ണ്‍ കെട്ടാതെ ഇങ്ങനെ കറങ്ങി തിരിയുന്നത്‌. പെണ്ണ്‍ കാണാന്‍ പോകുമ്പോഴെ അവരുടെ വീട്ടുക്കാര്‍ക്കും മനസ്സിലാകും ഇവനു കയ്യാല കയറാന്‍ പറ്റില്ലായെന്ന്....
പിന്നെ ഒരു പൊടിയാടിക്കാരനാണെങ്കില്‍ [ശ്രീവല്ലഭന്‍] എന്റെ കാലൊടിഞ്ഞ വാര്‍ത്ത വിശ്വസിച്ചേയില്ല. കുടലു എടുത്ത്‌ പുറത്ത്‌ കാണിച്ചാലും, ഓഹ്‌ അത് വാഴനാരാണെന്ന് പറയുന്ന കുറേ ബ്ലോഗറന്മാര്‍. ഈ ശരീരത്തില്‍ നിന്ന് വാഴനാരു പോലത്തെ കുടല്‍ അല്ലെ എനിക്ക്‌ കാട്ടാന്‍ പറ്റു. എന്നെ നിങ്ങള്‍ ഒന്ന് മനസ്സിലാക്കൂ.
അഞ്ചാം ക്ലാസ്സ്‌ തൊട്ട്‌ 10 വരെ ഒരുമിച്ചിരുന്ന് പഠിച്ച മോജസ്സ്‌, ഇപ്പോഴാണു എന്റെ കഴിവ്‌ മനസ്സിലായത്‌. അവന്‍ എപ്പോള്‍ എന്റെ അടുത്ത്‌ നിന്ന് മാറിയോ അന്ന് ഞാന്‍ രക്ഷപ്പെട്ടതാ.
പൊന്‍കുന്നത്തെ വക്കീല്‍ സാര്‍ എന്റെ വീഴ്ച്ച നന്നായി അങ്ങ്‌ ഘോഷിച്ചു. പത്രക്കാര്‍ നമ്മുടെ സന്തോഷ്‌ മാധവനെ താങ്ങിയതു പോലെ....കൃഷ്ണ കൃഷണ മുകുന്ദാ ജനാര്‍ദ്ദനാ...
ചക്കര പതിവ്‌ പോലെ :) കാര്യങ്ങള്‍ ഒതുക്കി.
നവരുചിയന്‍ അല്‍പം മനുഷ്യത്വം കാട്ടി.
റ്റീനയാണെങ്കില്‍ കൊച്ചിന്റെ കച്ചേരി മാത്രമേ കണ്ടുള്ളു.
പിന്നെ സ്മിത അല്‍പം കരുണയോടെ കാര്യങ്ങള്‍ കണ്ടു. പ്രതികരിച്ചു. ഭര്‍ത്താവിന്റെ കൈ ഒടിഞ്ഞ കാര്യത്താല്‍ പെട്ടെന്ന് വിഷമങ്ങള്‍ മനസ്സിലായി.
കല്‍പക്‌:- അവന്‍ ഒരു കാലത്തും....[വാക്കുകള്‍ കിട്ടുന്നില്ല] ഞൊണ്ടി പുരാണമെന്നാക്കണം പോലും... നിന്റെ ഫോട്ടോ ഞാന്‍ സന്തോഷ്‌ മാധവനു അയയ്ച്ചു കൊടുത്തിട്ടുണ്ട്‌. വല്ല സി.ഡിയിലും കയറാന്‍ അദ്‌ദ്ദേഹം സഹായിച്ചേക്കും.
ബിജോയ്ക്ക്‌ സംശയം എന്റെ കിഡ്നി ഡോക്ടേഴ്സ്‌ അടിച്ച്‌ മാറ്റിയോ എന്ന്. ഇല്ല.. എന്റെ 2007ലെ രജനി ഫാന്‍സ്‌ എന്ന പോസ്റ്റ് വായിച്ചാല്‍ അത് വ്യക്തമാകും. കിഡ്നി ഇപ്പോഴും യഥാസ്ഥാനത്ത്‌ ഉണ്ട്.
പിന്നെ കാപ്പിലാന്‍ ചേട്ടന്‍, ഓര്‍മ്മകള്‍ ഉണ്ടായിരിക്കേണം, കുറ്റയാടിക്കാരന്‍ എന്നിവര്‍ക്കെല്ലാം നന്ദി..
മോളി ഒരു അമ്മയുടെ സ്ഥാനത്ത്‌ നിന്ന് കാര്യങ്ങള്‍ കണ്ടു. വേദനയില്‍ പങ്കു കൊണ്ടു. ഇതാണു മക്കളെ സ്നേഹം...
മിഴിവിളക്കിനു ഞാന്‍ വീണത്‌ വളരെ ഇഷ്ടപ്പെട്ടു. ബ്ലോഗിനു വക ആയല്ലോ എന്ന്. ദൈവമേ ഇവരോട്‌ നീ അങ്ങ്‌ ക്ഷമിക്കണമേ!!!
ഏറനാടന്‍ ചേട്ടന്‍ ഒരു ഉപദേശം തന്നു...നോക്കിയും കണ്ടും നടക്കണെയെന്ന്. ഇനി അത്രേയുള്ളു ചേട്ടാ...
പിന്നെ രാജേഷ്‌, ജോണ്‍, കളര്‍ഫുള്‍ കാന്‍വാസ്‌ എന്നിവര്‍ക്കും നന്ദി.
ജെ.കുട്ടന്‍ അനസ്തേഷ്യ പ്രശനകാരന്‍ ആണെന്ന സത്യത്തിന്റെ കൂടെ നിന്നതിനു താങ്ക്‌ യൂ.
ജിഹേഷേ;- ഞാന്‍ പിച്ച വെച്ച്‌ നടന്ന് തുടങ്ങി കേട്ടോ...
ഇന്ന് നമ്മുടെ കൊടകര ചേട്ടനും ആത്മാര്‍ത്ഥമായി കമന്റി. മാമ്മുക്കോയ ഏതോ സിനിമയില്‍ ജയറാമിന്റെ തോളില്‍ കയ്യിട്ടിട്ട്‌ ഇനി ആരുണ്ടെടാ ഇവിടെ ഞങ്ങളോട്‌ എതിര്‍ക്കാന്‍ എന്ന് ചോദിച്ചത്‌ പോലെ എല്ലാവരോടും ചോദിക്കാന്‍ എനിക്ക്‌ മുട്ടുന്നു.
ഏതായാലും നിങ്ങള്‍ക്ക്‌ എല്ലാവര്‍ക്കും നന്മകള്‍ മാത്രം നേര്‍ന്ന് കൊണ്ട്‌...
സ്നേഹിക്കാന്‍ മാത്രം അറിയവുന്ന ഒരു നല്ല ഹൃദയത്തിന്റെ ഉടമയായ ഞാന്‍ നിര്‍ത്തട്ടെ.
സസ്നേഹം...
സെനു ഈപ്പന്‍ തോമസ്‌
പഴമ്പുരാണംസ്.
“ഞാന്‍ സൂക്ഷിച്ച്‌ കിടന്നില്ലായെങ്കില്‍ തന്റെ ‘പുറലോകം’ നാട്ടുകാരും, സഹപ്രവര്‍ത്തകരും കാണും.
4 മണിക്കൂറത്തെ അശ്രാന്ത പരിശ്രമത്തിനു ശേഷം
എന്റെ മൂത്രം എസ്‌.എസ്‌.എല്‍.സി പേപ്പര്‍ ചോര്‍ന്നതു പോലെ അറിയാതെ അങ്ങ്‌ ‘ചോര്‍ന്നു’ പോയി.
ഒരു കൈ മുന്‍പിലേക്ക്‌ നീട്ടി എന്നോടായി പറഞ്ഞു, ഈ കോടതി മുന്‍പാകെ സത്യം മാത്രമേ ബോധിപ്പിക്കൂ.....(ഫോട്ടോയും കിടിലം)“
ഹഹഹഹ!!
പ്രയോഗങ്ങള്‍ ഇഷ്ടപ്പെട്ടു!! ശൈലി മാറിയപ്പോള്‍ ഇതെന്താ പറയാന്‍ പോകുന്നത് എന്ന് ആദ്യം സംശയിച്ചു..പകുതി കഴിഞ്ഞപ്പോള്‍ കുറച്ചു ഫോമായി.
എങ്കിലും,
ടൈറ്റില്‍ ഇഷ്ടമായില്ലെന്നും,ഈ അനുഭവത്തിന് പഴയശൈലിതന്നെ മതിയായിരുന്നു എന്നും പറഞ്ഞോട്ടെ.
വെറുതേ ഇരിക്കുന്ന ചന്തീമെ ചുണ്ണാംബിട്ട് പൊള്ളിച്ചതു പോലായി.
എന്തായാലും എന്റെ യഥാര്‍ഥ പ്രായം നാട്ടുകാര്‍ അറിഞ്ഞല്ലോ...നന്ട്രി...സെനുച്ചായാ..നണ്ട്രി...
(ഞാന്‍ ഇങ്ങേരെ അച്ചാ‍യാ എന്നു വിളിക്കണേല്‍ മൂപ്പരുടെ പ്രായം ഊഹിക്കവുന്നതല്ലേയുള്ളൂ...)
senu katha kollam..............
eppol ellam sughamayoo??????????
hope u get well soon.
sarikkum kalu poyo
കാലൊടിഞ്ഞത് അറിഞ്ഞിരുന്നുവെങ്കിലും ഇത്രയും സംഭവ ബഹുലമായിരുന്നൂന്ന് ഇപ്പഴാ അറിഞ്ഞത്.
ഇപ്പോ എല്ലാം ശരിയായല്ലോ അല്ലേ?
:)
“സെനു....സെനുവിന്റെ നാക്ക്‌ അനസ്തീഷ്യാ തന്നാലും അടങ്ങി കിടക്കില്ലായെന്ന സത്യം ഇന്നലെ മാത്രമാണെനിക്ക്‌ മനസ്സിലായത്‌”.
സെനുവേ..
എത്രയും വേഗം കാല് പൂര്‍വ്വസ്ഥിതിയിലായിത്തീരട്ടെ..അതായിത് ക്രിക്കറ്റ് സ്റ്റമ്പ് പോലെയായി വരട്ടേന്ന്..
ഹഹ. പ്രയോഗങ്ങള്‍ കിടിലന്‍.. ആ ദുര്‍നടപ്പിനെപ്പറ്റി പറഞ്ഞവനെ കൈയ്യില്‍ കിട്ടീരുന്നെങ്കില്‍..!
athe shariya nadakumbol maatrame ee prashanam ullathinal പഴമ്പുരാണംസ് © Pazhamburanams mudangathe vayikan patte. Pinne amitabh bachan Reid & taylor suiting inte parasyathil anne vannathe(not Raymonds)ipo pulle enthe kitteyalum iddum(chelapol onnum idar illa)
Enthayalum kaal okke nere akki veendum pillare ithe pole nalla idea thanne parishikatte!!
ഗൂഗിളില്‍ 'തമാശകള്‍' എന്നടിച്ച്‌ സെര്‍ച്ച്‌ ചെയ്തത്‌ അലപം ചിരിക്കാനാണു. അങ്ങനെയാണു ഷൂട്ടിങ്ങ്‌ തമാശകള്‍ എന്റെ ശ്രദ്ധയില്‍ വന്നത്‌. വായിച്ചു. മനം നിറഞ്ഞ്‌ ചിരിച്ചു. ഒടുക്കം ഞാന്‍ കരുതി എന്നെ പോലെ ഈ ബ്ലോഗ്‌ മറ്റുള്ളവര്‍ക്കും ചിരിക്കാന്‍ വക നല്‍കാനായി ഞാന്‍ പഴമ്പുരാണംസ് ഡെഡിക്കേറ്റ്‌ ചെയ്യുന്നു.
തമാശകള്‍ = www.pazhamburanams.blogspot.com
ചിരി സൈറ്റ്‌- www.pazhamburanams.blogspot.com
നിങ്ങളുടെ റ്റെന്‍ഷന്‍ മറന്ന് ചിരിക്കാന്‍, ഉല്ലസിക്കാന്‍ ഈ സൈറ്റ്‌ ഉപകരിക്കുമെന്ന് ഞാന്‍ ഗ്യാരണ്ടി. ഒരു ശ്രീനിവാസന്‍ സിനിമ പോലെ മനോഹരം.
സെനു ഈപ്പന്‍ തോമസിന്റെ പഴമ്പുരാണംസ് തമാശകളുടെ ലോകം കീഴടക്കട്ടെയെന്ന് ആശംസിക്കുന്നു
ഇന്ന് പിന്നാമ്പുറം കാണിച്ചു....നാളെ ഉമ്മറം കാണിക്കരുതേ.... :p
Post a Comment