Thursday 1 May 2008

പത്തൊന്‍പതാം അടവ്‌:- “കത്രിക പൂട്ട്‌ അഥവാ സിസ്സര്‍ ലോക്ക്‌.”

10 തട്ട്‌ തടുക്കാം, പക്ഷെ ഒരു മുട്ട്‌ തടുക്കാമോ???

പ്രശസ്ത കളരി അഭ്യാസി പൊടിയാടി ഗുരുക്കള്‍ ചോദിച്ചതാണത്രേ ഈ ചോദ്യം. 18 അടവും പഠിച്ചവര്‍ക്കു പോലും ഇവനെ തടുക്കാന്‍ പറ്റില്ലത്രേ. പിന്നെയാണോ ഒരു അടവു പോലും അറിയാന്‍ വയ്യാത്ത നമ്മള്‍.

പ്രീഡിഗ്രി സമയം. എന്റെ കസ്സിന്റെ വീട്‌ പീരുമേട്ടിലുള്ളതിനാല്‍ അവധി സമയം മിക്കവാറും ഞങ്ങള്‍ പീരുമേടിനാണു പോകുന്നത്‌. പുല്ലുപാറ, കുട്ടിക്കാനം, വാഗമണ്‍, തേക്കടി, മൂന്നാര്‍ ഇവകള്‍ ഇന്നും എന്റെ പ്രിയപ്പെട്ട ഒഴിവുകാല സങ്കേതങ്ങള്‍ തന്നെ. അങ്ങനെ പതിവു പോലെ ഞാനും എന്റെ കസ്സിനും കൂടി പീരുമേടില്‍ നിന്നും അവധിയൊക്കെ അടിച്ച്‌ പൊളിച്ചിട്ട്‌ തിരിച്ച്‌ വരികയാണു. പൊന്‍കുന്നം തൊട്ട്‌ എനിക്ക്‌ ദാഹിക്കാന്‍ തുടങ്ങിയതാണു, പക്ഷെ കസ്സിന്‍ അവിടെയെങ്ങും വണ്ടി നിര്‍ത്താന്‍ കൂട്ടാക്കിയില്ല. അങ്ങനെ ഞങ്ങള്‍ ചങ്ങനാശ്ശേരി കഴിഞ്ഞ്‌, പെരുന്തുരുത്തിയും കഴിഞ്ഞ്‌ ഒരു ചെറിയ പെട്ടികടയുടെ മുന്‍പില്‍ വണ്ടി നിര്‍ത്തി. ആ കടയുടെ മുന്‍പില്‍ ഒരു കാര്‍ഡ്ബോര്‍ഡില്‍, ചുണ്ണാമ്പ്‌ കൊണ്ട്‌ വളരെ പൈശാചികവും, മൃഗീയവുമായ കൈയക്ഷരത്തില്‍ 'മോരും വെള്ളം വില്‍ക്കപ്പെടും' എന്ന് എഴുതി തൂക്കിയിട്ടതിലേക്ക്‌ കൈ ചൂണ്ടി അചാച്ചന്‍ പറഞ്ഞു-ഇവിടുത്തെ മോരും വെള്ളം കുടിച്ചാല്‍ പിന്നെ നമ്മള്‍ വേറെ ഒന്നും കുടിക്കില്ല. അത്രയ്ക്ക്‌ റ്റേസ്റ്റ്‌ ആണു. അങ്ങനെ അചാച്ചന്റെ താത്പര്യപ്രകാരം ഞാനും ആ മൊരും വെള്ളം കുടിക്കാന്‍ തീരുമാനിച്ചു. കുടിച്ചപ്പോള്‍ ആഹഹ.. അചാച്ചന്‍ പറഞ്ഞത്‌ സത്യം തന്നെ. എന്തൊരു രുചി. ഇഞ്ചിയും, പച്ചമുളകും ഒക്കെ പാകത്തിനിട്ട്‌, പരുവത്തിനു തണുപ്പുമുള്ള മോരും വെള്ളം.. രുചി കാരണം വീണ്ടും ഒരു ഗ്ലാസ്സ്‌ കൂടി കുടിച്ച്‌, നീട്ടി ഒരു ഏമ്പക്കവും വിട്ട്‌, അല്‍പം മാറി അവിടുത്തെ കണ്ടത്തിലേക്ക്‌ നോക്കി, തികച്ചും കേരളീയ സ്റ്റയിലില്‍ മൂത്രവുമൊഴിച്ച്‌ വീണ്ടും യാത്ര തിരിച്ചു. 4 ഗ്ലാസ്സ്‌ മോരും വെള്ളത്തിനു 4 രൂപാ മാത്രം. വണ്ടിയില്‍ കയറിയിട്ടും ഞങ്ങള്‍ അതിന്റെ രുചിയെ പറ്റി വാഴ്ത്തി സ്തുതിച്ചു കൊണ്ടിരുന്നു.

അല്‍പം കഴിഞ്ഞ്‌ മുത്തൂര്‍ എന്ന സ്ഥലം കഴിഞ്ഞപ്പോള്‍, എന്റെ വയറ്റില്‍ ഒരു ഉരുണ്ട്‌ കയറ്റം, ഒരു കൊള്ളിയാന്‍ മിന്നല്‍... ദൈവമേ!!! മുത്തൂര്‍ എന്ന പേരു ഇവിടെ യാത്ഥാര്‍ത്ഥ്യമാകാന്‍ പോവുകയാണോ? ഞാന്‍ ഒരല്‍പ്പം ബലം പിടിച്ചിരുന്നു. എന്റെ വയറ്റിലെ ഓര്‍ക്കസ്റ്റ്രയുടെ ശബ്ദം വെളിയില്‍ കേട്ട്‌ തുടങ്ങി. ഇനി പിടിച്ചു നില്‍ക്കാന്‍ പറ്റുമെന്ന് തോന്നുന്നില്ല. എന്റെ അവസ്ത്ഥ മനസ്സിലാക്കിയിട്ടെന്നോണം അചാച്ചന്‍ വണ്ടിയ്ക്ക്‌ വേഗം കൂട്ടിയത്‌ ഞാനറിഞ്ഞു. ഞാന്‍ എന്റെ സങ്കടാവസ്ത്ഥ തുറന്ന് പറഞ്ഞു.. അപ്പ്പ്പോളാണു ഞാന്‍ ആ ഞെട്ടിക്കുന്ന വാര്‍ത്ത അറിഞ്ഞത്‌.. അചാച്ചനും അതേ അവസ്ത്ഥയില്‍ തന്നെ.. അതാണു വണ്ടിയുടെ സ്പീഡ്‌ എഴുപതില്‍ നിന്നും തൊണ്ണൂറിലേക്ക്‌ കുതിച്ചത്‌. പിന്നെ ഞങ്ങള്‍ രണ്ടാളും ഒന്നും മിണ്ടാതെ നമ്മുടെ പഴയ പ്രധാന്മന്ത്രി ശ്രീ. നരസിംഹറാവുവിനെ പോലെ ഇരുന്നു.

വണ്ടിയ്ക്കു സ്പീഡ്‌ പോരാ.. സകല ദൈവങ്ങളെയും വിളിച്ചു. ഏതായാലും അചാച്ചന്‍ വണ്ടി നേരെ കൊണ്ടു ഒരു ഹോട്ടലിന്റെ മുന്‍പില്‍ ചവട്ടി നിര്‍ത്തിയതും ഞങ്ങള്‍ രണ്ടാളും ചാടിയിറങ്ങിയതും ഒപ്പം ആയിരുന്നു. അപ്പോള്‍ അവിടുത്തെ കൊമ്പന്‍ മീശക്കാരന്‍ സെക്യുരിറ്റി, കാര്‍ പാര്‍ക്ക്‌ ചെയ്തത്‌ ശരിയായില്ലായെന്ന് പറഞ്ഞ്‌ വന്നപ്പോള്‍ , അചാച്ചന്‍ കാറിന്റെ താക്കോല്‍ പുള്ളിയെ തന്നെയേല്‍പ്പിച്ച്‌, ചേട്ടന്‍ തന്നെ അങ്ങു പാര്‍ക്കു ചെയ്യെന്ന് പറഞ്ഞ്‌ ഹോട്ടലിനുള്ളിലേക്ക്‌ ഓടി കയറി.

കഷ്ടകാലം പിടിച്ചവനു കക്കൂസില്‍ പോകാന്‍ മുട്ടുമ്പോള്‍ അണ്ടര്‍വെയറിന്റെ പീത്തയ്ക്ക്‌ കടുംക്കെട്ട്‌ വീണുയെന്ന് പറഞ്ഞതു പോലെ ഞങ്ങളെയ്ക്കാട്ടിലും മുന്‍പേ ഒരുത്തന്‍ അതില്‍ ഉണ്ട്‌. മുട്ടുവീന്‍ തുറക്കപ്പെടും എന്ന ആപ്ത വാക്യം മനസ്സില്‍ വെച്ച്‌ മുട്ടി... അവന്‍ തുറന്നില്ല. പക്ഷെ പെണ്ണുങ്ങളുടെ റ്റോയിലറ്റ്‌ ഒഴിഞ്ഞു കിടക്കുന്നു. അചാച്ചന്‍ അതിനെ ലക്ഷ്യമാക്കിയപ്പോള്‍ ഞാന്‍ പറഞ്ഞു അത്‌ ഷീ ആണു കേട്ടോ [ആണുങ്ങളുടെ റ്റോയിലറ്റിന്റെ അവിടെ ഹീയെന്നും പെണ്ണുങ്ങളുടെ റ്റോയിലെറ്റിന്റെ അവിടെ ഷീ എന്നുമാണു അവിടെ നാമകരണം ചെയ്തിരിക്കുന്നത്‌]ഓഹ്‌, പോയി പണി നോക്കാന്‍ പറ.. കക്കൂസില്‍ പോകാന്‍ മുട്ടി നില്‍ക്കുമ്പോഴാ ഹീയും ഷീയും.. അചാച്ചന്‍ അകത്തു കയറി കതകടച്ചു.

ഞാന്‍ പിന്നെയും വെളിയില്‍ തന്നെ. നട തുറക്കുന്നതും കാത്ത്‌ നില്‍ക്കുന്ന ഭക്തനെ പോലെ ഞാന്‍ വിറച്ചു നിന്നു. നക്ഷത്ര ഹോട്ടലാ... 2 റ്റോയിലറ്റ്‌ മാത്രം. ഇവിടെ ഈ അവസ്തയില്‍ നില്‍ക്കുമ്പോഴായിരിക്കും നക്ഷത്രം കാണുന്നത്‌...പിന്നെ ബില്ല് കിട്ടുമ്പോഴും...ഞാന്‍ പിറുപിറുത്ത്‌ കൊണ്ടിരുന്നു. അവസാനം സഹിക്കാതെ ഞാന്‍ അചാച്ചന്റെ റ്റോയിലറ്റിന്റെ കതകിനു മുട്ടിയിട്ട്‌ പറഞ്ഞു-ഒന്ന് വേഗം ഇറങ്ങ്‌...എനിക്ക്‌ ഇനിയും പിടിച്ചു നില്‍ക്കാന്‍ വയ്യ.
അപ്പോള്‍ അചാച്ചന്റെ വക പുതിയ റ്റെക്നിക്ക്‌... എടാ.. നീ കത്രിക പൂട്ട്‌ ഇട്ടു നില്‍ക്കാന്‍... [കാല്‍ കത്രിക പോലെ വെച്ച്‌ നില്‍ക്കാന്‍] ഓഹ്ഹൊ.. വലിയ കാര്യമായി പോയി.. ഈ റ്റെക്നിക്ക്‌ അറിയാമാഞ്ഞിട്ടാണോ...ഷീയില്‍ ഓടി കയറിയത്‌... എന്നിട്ട്‌ അകത്തിരുന്ന് എന്നോട്‌ ഉപദേശിക്കുന്നു...കത്രിക പൂട്ട്‌ ഇടാന്‍... ദൈവമേ.. നീ ഇതു ഒന്നും കാണുന്നില്ലേ...???

എന്റെ ആ പ്രാര്‍ത്ഥന ദൈവം കേട്ടു. അതാ നട തുറന്നു... അയാള്‍ പുറത്തിറങ്ങുന്നതിനു മുന്‍പേ ഞാന്‍ അകത്തു കയറി. സത്യം പറയാമല്ലോ...മുട്ട്‌ മടക്കിയതു പോലും എനിക്ക്‌ ഓര്‍മ്മയില്ല. എല്ലാം വളരെ പെട്ടന്നായിരുന്നു. Sprinkle ഉപ്പിന്റെ പരസ്യം പോലെ, എക്സ്റ്റ്രാ ഫ്രീ ഫ്ലോ!!! മകളെ കെട്ടിച്ചു വിട്ട അപ്പന്റെ കണക്കെ ഞാന്‍ തളര്‍ന്നിരുന്നു. അല്‍പം കഴിഞ്ഞപ്പോഴാണു എനിക്ക്‌ സ്ഥലകാല ബോധം ഉണ്ടായത്‌. ദൈവമേ... ഞാന്‍ ആ ആവേശത്തില്‍ പാന്റ്‌ ഊരിയായിരുന്നോ?? ഓഹ്ഹ്‌ ഊരി...ഊരി...പക്ഷെ ഞാന്‍ ഒരു ഹൃദ്രോഗിയെ പോലെ വിയര്‍ത്ത്‌ കുളിച്ചിരുന്നു.

ഞാന്‍ കതക്‌ തുറന്ന് പുറത്തു വന്ന് അല്‍പം കഴിഞ്ഞാണു അചാച്ചന്‍ പുറത്തു വന്നത്‌ തന്നെ..

4 രൂപാ മുടക്കി മോരും വെള്ളം കുടിച്ചു കുടലു കൂടി പുറത്ത്‌ കളഞ്ഞ 2 ആത്മാക്കള്‍.. വേച്ചു വേച്ചു ആ റെസ്റ്റോറന്റ്‌ കം ബാര്‍ ഹോട്ടലിന്റെ വെളിയിലേക്കു ഇറങ്ങി വരുന്നതു കണ്ട്‌ ആള്‍ക്കാര്‍ പറഞ്ഞു….ഹും പെരുപ്പാ… സത്യത്തില്‍, എവിടെയാണു പെരുത്തതെന്ന് ഞങ്ങള്‍ക്കേ അറിയൂ...

ഇനി എന്റെ പൊടിയാടി ഗുരുക്കളേ, അങ്ങ്‌ പറഞ്ഞത്‌ എത്രയോ സത്യം- 10 തട്ട്‌ തടുക്കാം.. പക്ഷെ “ഒരു മുട്ട്‌ “ തടുക്കാന്‍ പറ്റില്ല. [അതു ഏത്‌ മുട്ട്‌ എന്ന് ഇനിയും ചോദിക്കരുതേ. ] ഇതു സത്യം, സത്യം, സത്യം.

46 comments:

ശ്രീനാഥ്‌ | അഹം said...

ha ha...

ശ്രീവല്ലഭന്‍. said...

അത് ശരിയാ. ഒരു മുട്ടു തടുക്കാന്‍ പറ്റില്ല. ആരാ ഈ പൊടിയാടി ഗുരുക്കള്‍? :-)

ഇനി രണ്ട് ഉദാ:
1. ഒരു ചൂടു കാലത്ത് ജയ്പൂരില്‍ നിന്നും ഡല്‍ഹിയിലെയ്ക്കുള്ള ബസ് യാത്ര. സാങ്കേതിക കാരണങ്ങള്‍ മൂലം രാത്രിയില്‍ എവിടെയോ വച്ചു രണ്ടു മണിക്കൂര്‍ യാത്ര തടസ്സപ്പെട്ടതിനാല്‍ രാവിലെ 7 മണിക്ക് എത്തണ്ട ബസ് ഒന്‍പതായിട്ടും ഹരിയാന ആയതേയുള്ളു. പെട്ടന്ന് ഒരു മാന്യദേഹം കണ്ടക്ടരുമായ് വാക്കു തര്‍ക്കം. വണ്ടി നിര്‍ത്തണമത്രേ. അയാള്‍ പറ്റില്ലെന്നും. യാത്രക്കാരില്‍ കണ്ണില്‍ ചോരയില്ലാത്ത ചിലര്‍ ഏറ്റ് പിടിച്ചു. അവര്‍ക്കെല്ലാര്‍ക്കും പെട്ടന്ന് ഡല്‍ഹിയില്‍ ചെന്നിട്ടു കാര്യങ്ങള്‍ ഉണ്ടത്രേ. മാന്യദേഹത്തിന്റ്റെ മുഖം ദയനീയമായി. ഒരു അഞ്ചു മിനുട്ട് നിര്‍ത്താന്‍ പറഞ്ഞ ചേട്ടായി അവസാനം ബസിന്റ്റെ സൈഡില്‍ അടി തുടങ്ങി. കരയാനും. ചിലര്‍ക്ക് അലിവ്‌ തോന്നി രണ്ടു മിനുട്ട് അനുവദിച്ചു കൊടുത്തു. കണ്ടക്ടറിന്റെ കോളറിന് പിടിച്ച് ഒരു വെളിമ്പ്രദേശത്ത് ബസ് നിര്‍ത്തിച്ചു. അപ്പോള്‍ പ്രശ്നം- വെള്ളം ഇല്ല. ആരെങ്കിലും വെള്ളം തരൂ എന്നായി ചേട്ടായി. പലരുടെ കയ്യിലും വെള്ളം അല്പം മാത്രമെ ഉണ്ടായിരുന്നുള്ളൂ. ചൂടു കാലമായതിനാലും ഡല്‍ഹിയിലേയ്ക്ക് ഒരു മണിക്കൂറില്‍ കൂടുതല്‍ യാത്ര ഉണ്ട് എന്നതിനാലും ആരും ഉള്ള വെള്ളം വിട്ടു കൊടുക്കാന്‍ തയാറായില്ല. ഒരു വിധത്തില്‍ ചേട്ടായിയെ ഭീഷണിപ്പെടുത്തിയപ്പോള്‍ ആള്‍ ഇറങ്ങി. പലരും ദേഷ്യപ്പെടുന്നു, ചിലര്‍ ചിരിക്കുന്നു. (ആഹാ- പലരുടെയും വയറ്റില്‍ ഒരേ സ്വരം ആയിരുന്നിരിക്കണം- രാവിലെ ഒന്‍പതു മണി!). ഏതായാലും നാലഞ്ചു മിനിട്ടു കഴിഞ്ഞപ്പോള്‍ ചേട്ടായി പൊന്തക്കാട്ടില്‍ നിന്നും ചമ്മലോടെ പൊങ്ങി വന്നു. ബസില്‍ കയറിയ ശേഷം ഒരു അനൌണ്‍സ്മെന്റ് : "മേ നേ കര്‍ച്ചീഫ് ഇസ്തെമാല്‍ കിയാ" (ഞാന്‍ കര്‍ച്ചീഫ് ഉപയോഗിച്ചു)!

2. KSRTC ബസില്‍ കോഴിക്കോട്ടു നിന്നും എറണാകുളത്തേയ്ക്കുള്ള യാത്ര. ഇടയ്ക്ക് ഒരു ചേട്ടായി കണ്ടക്ടറിനോട് ചെവിയില്‍ കുശു കുശുക്കുന്നു (പതിയെ സംസാരിക്കുന്നതിന്റെ തിരുവല്ലാ ഭാഷ). കണ്ടക്ടര്‍ ഡ്രൈവറെ മീറ്റ് ചെയ്യുന്നു. ആകെപ്പാടെ ഒരു പ്രശ്നം മണത്തറിഞ്ഞ ചിലര്‍ ചേട്ടായിയെ ചോദ്യം ചെയ്യാന്‍ നോക്കി. പെട്ടന്ന് ഒരു വീടിന്‍റെ മുന്‍പില്‍ ബസ് നിര്‍ത്തി. ചേട്ടായി ചേച്ചിയോടൊപ്പം അപ്രത്യക്ഷരായി. നാല് വയസ്സുള്ള മകന്‍ ബസില്‍ ഇരുപ്പുണ്ട്. ചിലര്‍ ദേഷ്യപ്പെടുന്നു. ഓരോരുത്തരുടെ ബന്ധു വീട്ടില്‍ ബസ് നിര്‍ത്തിക്കൊടുക്കുന്നത് അന്യായം ആണത്രേ. കണ്ടകടര്‍ വെറുതെ ചിരിച്ചു കൊണ്ടിരുന്നതല്ലാതെ ഒന്നും പറഞ്ഞില്ല. ചിലര്‍ക്ക് കാര്യം മനസ്സിലായിക്കാണണം. കുറച്ചു എലാവരുറെയും ക്ഷമ നഷ്ടപ്പെട്ടു കൊണ്ടിരുന്നപ്പോള്‍ വീട്ടുകാരോടു നന്ദി പറഞ്ഞിട്ട്‌ കപ്പിള്‍സ് പ്രത്യക്ഷപ്പെട്ടു. മകന്‍റെ ഉറക്കെയുള്ള ചോദ്യം കേട്ടു ബസിലുള്ളവര്‍ ഒന്നു ഞെട്ടി. പിന്നെ ചിരിച്ചു. ആ ചോദ്യം ഇതായിരുന്നു : " മമ്മീ അപ്പിയിട്ടോ? "

jyothi said...

ഹഹഹ....തടുക്കാനാവാത്ത മുട്ടു കേമം!സേനു....ശൈലി നന്നു, ട്ടോ!ആസ്വദിച്ചു.

അശോക് കർത്താ said...

ഇതു വായിച്ചപ്പോ എനിക്കും വയറ്റിലൊരു മുട്ട്.........ദാ പ്പ പോയിട്ട് വന്നിട്ട് കമന്റിടാം. അല്ലെങ്കില്‍........മോശമല്ലെ.

Kalpak S said...

എന്റെ പൊന്നു സേനൂച്ചായാ‍... ഇതേ ഒരു അനുഭവം എന്റെ ഒരു ഫ്രണ്ടിനുണ്ടായി, നീയെന്തു ചെയ്തു എന്ന എന്റെ ചോദ്യത്തിന് അവന്‍ ഉത്തരം തന്നത് ഇങ്ങനെ ആയിരുന്നു “വടകര ബസ്റ്റാന്റ് ഒരു നിമിഷത്തേക്ക് എനിക്ക് ഒരു കാടായി തോന്നി എന്ന്”

എന്തായാലും കലക്കി....

smitha adharsh said...

ഇങ്ങനേം മഹാ വൃത്തികെട്ട കാര്യം എഴുതി,മനുഷ്യനെ ചിരിപ്പിച്ചു കൊല്ലരുത്‌..ചിരിച്ചു..ചിരിച്ചു...കുടലില്‍ കത്രിക പൂട്ടു വീണു...
അടി പൊളി..കേട്ടോ..

Sherlock said...

ഈ എഴുത്ത് രസകരമായി...:) പുതിയ പ്രയോഗങ്ങള് കുറച്ചുണ്ടല്ലോ

qw_er_ty

കാവലാന്‍ said...

ഹെന്റെ പൊന്നോ.....ചിരിച്ചു ചാവുമോ?...

അരവിന്ദ് :: aravind said...

സെനു, ചിരിച്ച് ചിരിച്ച് വീണിഷ്ടാ.
അപാര കോമഡി.

:-))

മൂര്‍ത്തി said...

:) ചിരിച്ചു..ശ്രീവല്ലഭന്റെയും കല്പകിന്റ്റെയും കമന്റും കൊള്ളാം..

Senu Eapen Thomas, Poovathoor said...

കമന്റ്സ്‌ കണ്ടപ്പോള്‍ അടങ്ങി ഇരിക്കാന്‍ പറ്റിയില്ല.

ആദ്യം ശ്രീവല്ലഭനോട്‌: ഒരു പൊടിയാടിക്കാരനായിട്ട്‌ ഈ പൊടിയാടി ഗുരുക്കള്‍ ആരാണെന്ന് ചോദിച്ചതു ഒട്ടും ശരിയായില്ല. കാരണം ആ ഗുരുക്കള്‍ ഞാന്‍ തന്നെ. അനുഭവമേ ഗുരു എന്ന് പണ്ട്‌ ഏതോ ഗുരു പറഞ്ഞിട്ടുണ്ട്‌. മാത്രവുമല്ല..വല്ലഭന്‍ പറഞ്ഞ കഥകള്‍ ഒരു ബ്ലോഗിനുണ്ടല്ലോ എന്ന് ഈ ഉള്ളവന്‍ ചോദിച്ചപ്പോള്‍ പറഞ്ഞ മറുപടി, : ഓഹ്‌ എന്റെ ബ്ലോഗ്‌ നാറ്റിക്കേണ്ട എന്ന് വെച്ചു എന്ന് പറഞ്ഞപ്പോള്‍ തന്നെ വല്ലഭന്‍ ഇപ്പ്പ്പോഴും ആ പഴയ പൊടിയാടിക്കാരന്‍ തന്നെ എന്ന് തീര്‍ച്ചപ്പെടുത്തി. പിന്നെ ആ രണ്ട്‌ കഥകള്‍ക്കും സ്പെഷ്യല്‍ നന്ദി.

ഇനി കല്‍പക്‌: കഥ ഇഷ്ടപ്പെട്ടു. വടകരക്കാരോട്‌ സത്യം ചോദിക്കേണ്ടിയിരിക്കുന്നു.

എ.കെ ചേട്ടനു ഇതു വായിച്ചപ്പോള്‍ മുട്ട്‌ വന്നിട്ട്‌ പോയതാണു. ഇതു വരെ ശരിയായ കമന്റ്‌ വന്നിട്ടില്ല. ചേട്ടനും ആ മോരും വെള്ളം കുടിച്ചോ എന്ന് ചെറിയ സന്ദേഹം.

സ്മിതയ്ക്ക്‌ ഇതു മഹാ വൃത്തികെട്ട കാര്യമായി പോയി. അതു കൊണ്ടല്ലേ സ്മിതേ ഞാന്‍ വിറച്ച്‌ അവിടെ കാത്തിരുന്നത്‌.പരിസരം വൃത്തികേടാക്കാതെ. ഏതായാലും സ്മിതയ്ക്ക്‌ എന്റെ കദന കഥ ഇഷ്ടപ്പെട്ടു എന്നറിഞ്ഞതില്‍ സന്തോഷം.

ശ്രീനാഥ്‌, ജിഹേഷ്‌, കാവലാന്‍, അരവിന്ദേട്ടന്‍, മൂര്‍ത്തി...അങ്ങനെ ബ്ലോഗ്‌ വായിച്ച്‌ എന്റെ മുട്ടില്‍ ആര്‍മാദിച്ച എല്ലാവര്‍ക്കും എന്റെ പെരുത്ത നന്ദി.

പഴമ്പുരാണംസ്‌.

അശോക് കർത്താ said...

ചേട്ടനും ആ മോരും വെള്ളം കുടിച്ചോ എന്ന് ചെറിയ സന്ദേഹം...........
ഇല്ല സേനു, ഇല്ല. ആ മോരും വെള്ളം ഞാന്‍ കുടിച്ചില്ല. പക്ഷെ സേനുവിന്റെ ബ്ലോഗ് വായിച്ചു. പിന്നെ അതിന്റെ ആവശ്യമുണ്ടോ? അനായാ‍സ വിരേചനത്തിനു തിരുവല്ലാക്ക് വടക്ക് കോട്ടയത്ത് നിന്നിറങ്ങുന്ന ഒരു പത്രം ഉത്തമമാണെന്ന് കേട്ടിട്ടുണ്ട്. ഇതിപ്പോ അതിലും കടന്നു പോയി. സംഗതി അതിന്റെ സ്പിരിറ്റിലെടുക്കണേ....പോയ സംഗതിയല്ല.....കമന്റ്

കാപ്പിലാന്‍ said...

10 തട്ട്‌ തടുക്കാം.. പക്ഷെ “ഒരു മുട്ട്‌ “ തടുക്കാന്‍ പറ്റില്ല.

പൊടിയാടി ഗുരുക്കളേ വണക്കം.

നല്ല എഴുത്ത്.

ഈ മുട്ടു തടുക്കുന്നത് എങ്ങനെ എന്ന് പഠിപ്പിക്കണം :):)

ഗുരുജി said...

വായിച്ചപ്പോള്‍ ചിരി അടക്കാനാകുന്നില്ല...ഏതായാലും കത്രികപ്പൂട്ടിന്റെ അടവ്‌ പഠിച്ചുവെച്ചേക്കാം..ഭാവിയില്‍ ഗുണം ചെയ്‌തേക്കും. 'മുത്തൂര്‍' എന്ന സ്ഥലത്തെത്തിയപ്പോള്‍ ..വല്ലാത്ത നര്‍മ്മം തന്നെ ഹോ..

Xtian said...

Senu "valre paishachikavum mrigeeyavumaya reethiyil" enikku comment edan vayyaye...eppo edheham vicahrikkum "pazhampurannathinenta kombundo" ennu... Adutha story varunnathuvare njan Narasimha Rao nu padikkan pova....

Xtian said...

ethrem nal njan manthry safele G Sudhakaranu padikkuvarunnu... eee story vayichappol pettennu oru bodhodhayam...comment edanulla shareerikamaya prapthy enikkilla... evidunnelum ady vannalo... oru blog etta udane Senu bedil aayilley... pinne parayunnatho vadam valiyil patyathannennu... njan kallam kandupidichennu aarodum parenda ttoooo.... അടുത്ത സ്റ്റോറി വരുന്നതുവരെ ഞാന്‍ ശ്രീമാന്‍ Narasimha Rao nu പഠിക്കാന്‍ പോവാ... shhhhhhhh ഒന്നും ചോദിക്കല്ലേ plzzz......... എന്റെ കോഴ്സ്‌ ഞാന്‍ compleate ചെയ്യട്ടെ.... allengil adutha story read cheyyan njan undavilla....Kadhakarante kalu thalli odichu... vayanakakrude gathy entakumo aavvoo???????

നവരുചിയന്‍ said...

കൊള്ളാം മാഷെ നന്നയിടുണ്ട് കേട്ടോ ആദ്യം ആയിടാണ് ഇവിടെ ... എന്തായാലും കഥ വളരെ ഇഷ്ടപെട്ടു. ഞാന്‍ ബാക്കി കുടെ ഒന്നു വയികട്ടെ .....

siva // ശിവ said...

വല്ലാതെ ചിരിച്ചു പോയി....ആശംസകള്‍...

P Das said...

:-D

Jayasree Lakshmy Kumar said...

ദൈവമേ. ഇതൊരു ചിരിയുടെ മാലപ്പടക്കമായിപ്പോയി. വയ്യായേ

വിന്‍സ് said...

ഹഹഹ.... നന്നായി ചിരിച്ചു. ഇടക്കിടക്കുള്ള ഉപമകളും കലക്കന്‍.

ശ്രീ said...

ഹ ഹ. കത്രികപ്പൂട്ടിനും തടുക്കാനാവാത്ത ‘മുട്ടുകള്‍’ ഉണ്ടല്ലേ?
ചിരിപ്പിച്ചു.
:)

തോന്ന്യാസി said...

എല്ലാം വളരെ പെട്ടന്നായിരുന്നു. Sprinkle ഉപ്പിന്റെ പരസ്യം പോലെ, എക്സ്റ്റ്രാ ഫ്രീ ഫ്ലോ!!! മകളെ കെട്ടിച്ചു വിട്ട അപ്പന്റെ കണക്കെ ഞാന്‍ തളര്‍ന്നിരുന്നു.


ചിരിക്കാന്‍ എന്തിനാ വേറെ?

colourful canvas said...

Chetta........
nannayittunde.....
kathrikapootee....
kalyanm nadthiya appachan.....

ee prayogangalellam.....valarey rasamyirikkunnoo

aa pinney kathrika poottee.......athe orthe njn veendum veendum chiri varunnoo

Anonymous said...

വളരെ പൈശാചികവും മ്രിഗീയവുമായി പോയി സേനു ചേട്ടന്റെ മുട്ട് [;)]... രസമായിട്ടണ്ട്... നിങ്ങളുടെ രണ്ടുപേരുടെയും ആക്രാന്തം കണ്ട് ആ കടക്കാരന്‍ മോരില്‍ വിം ഇട്ടാരുന്നൊ എന്നു വേണെ ചിന്തിക്കാ‍മെ..... [:D][:D][:D]

ഏറനാടന്‍ said...

പൊടിയാടി ഗുരുക്കള്‍ ആണല്ലേ 19 അടവും പയറ്റിയ ഗുരുക്കള്‍. ഞാന്‍ അന്വേഷിച്ചുവരികയായിരുന്നു. ഇപ്പോ കിട്ടി, കണ്ടു. പിടിച്ചു. കൊള്ളാം ഒന്നൂടെ പൊലിപ്പിക്കാമായിരുന്നു പൊടിയാടി ഗുരുക്കളെ..:)

Anonymous said...

എല്ലാവര്‍ക്കും ഇത്തരം ഒരു അനുഭവം എങ്കിലും ഉണ്ടാവും എന്നതു കൊണ്ട് കാര്യം റിയലിസ്റ്റിക് ആണു കേട്ടൊ ജെ.കുട്ടന്‍

Anonymous said...

മുട്ടു കഥ വായിച്ചു. നന്നായിരിക്കുന്നു..."മുത്തൂര് എന്നത്‌ യഥാര്‍ത്യമാവുകയണോ"എനിക്കിഷ്ടപെട്ടു.

Jubin Jacob Kochupurackan said...

എന്റെ പൊന്നച്ചായാ... ഒള്ളതു പറയാമല്ലോ...
‘അടിപ്പനായിട്ടുണ്ട്’. നാട്ടകം പോളിടെക്നിക് കാന്റീനില്‍ നിന്നും പൊറോട്ടയും ബീഫും കഴിച്ചതിന്റെ ശിക്ഷ ഏതാണ്ടിതേ രീതിയില്‍ തന്നെയാണ് എനിക്കും കിട്ടിയത്. പരിസരം വൃത്തികേടാകാതിരുന്നത് മുജ്ജന്മസുകൃതം...
പിന്നേയ്...ആ കട ഇപ്പോഴും അവിടെത്തന്നെയുണ്ടാവുമോ...?
അല്ലാ...വെറുതേ ഒന്നു പോയി ഒരു മോരുംവെള്ളം കുടിക്കാമായിരുന്നു...

ഇനിയും ഇത്തരം അനുഭവങ്ങള്‍ എഴുതുക...
നാലാള്‍ കേള്‍ക്കട്ടെ...

Unknown said...

Podiyadi gurukkal athu paranjappol njanum undayirunnu, pakshe 2 muttu thadukkan okkumo ennanu njan kettathu
Onnayalum randayalum thadukkan paadanu

Chechy

Kichu $ Chinnu | കിച്ചു $ ചിന്നു said...

ലപ്പോ ലതാണ്‍ ലീ കത്രികപ്പൂട്ട് അല്ലെ?
കൊള്ളാം :-)

nandakumar said...

എന്റെ ‘മുട്ടന്‍’ തൊമാസെ... നാടു തടുക്കാം പക്ഷെ മൂടു തടുകാനാവില്ല എന്നു കേട്ടിട്ടില്ലേ... തറ്റ്നെ ആവര്‍ത്തിച്ചുള്ള അപേക്ഷ കേട്ടപ്പോള്‍ ഇത്രയും പ്രതീക്ഷിച്ചില്ല.. നന്നായിട്ടുണ്ട് വിവരണം. മക്കളെ കെട്ടിച്ചു വിട്ട അപ്പന്‍ കണക്കെ....ഹ ഹ ചിരിച്ചു ചിരിച്ചു....(ഒരു മിനിട്ടു....വയറിനെന്തോ ഒരിത്...ദിപ്പ വരാം....)

Anonymous said...

Ethu vayichappol vere oru sambhavam orma varunnu. Brotherilne friends ellavaru avarude friendinte marriagenu poyappol ethe muttu thudangi(thale divasathe party kazhichath pidichilla)vazhiyil kanunna hotelil ellam nirthi muttinu samanam kandu thudangi.Oru hotelil kayari ororutharum alpm asvasichirikkumbol oru friendine kanmanilla... Appool atha mobilil friend vilikkunnu aro pulliye bathroomil poothiyittu.....Mobile kandu pidichavane padi vazhthi adutha hotel lakzhiyamakki avar panju....

Dr.Biji Anie Thomas said...

ഹ ഹ..എന്തൊരവതരണ ശൈലി..കൊള്ളാം..
‘ചാമ്പ്യന്‍ മറിയചേടത്തി’ക്കൊരു കൊട്ടു കൊടുത്ത് എഴിതിവിട്ടതല്ലേ..ഇതിപ്പോ നന്നായി..ഇനി മേലാല്‍ തട്ടുകടയില്‍ നിന്ന് മോരും വെള്ളം കുടിക്കരുതെന്നൊരു പാഠവുമായി..

ഉഗാണ്ട രണ്ടാമന്‍ said...

കൊള്ളാം മാഷെ... നന്നയിടുണ്ട്...

നന്ദു said...

"ഇവിടുത്തെ മോരും വെള്ളം കുടിച്ചാല്‍ പിന്നെ നമ്മള്‍ വേറെ ഒന്നും കുടിക്കില്ല."
അത് പുള്ളിക്കാരൻ ആത്മാർത്ഥമായും പറഞ്ഞതാല്ലേ!!..
സേനുവിന്റെം അച്ചാച്ചന്റെം അന്നേരത്തെ ആ മുഖഭാവം ഇവിടിരുന്ന് വായിച്ചെടുക്കാം. നല്ല വിവരണം.
തുടരുക!

സതീഷ്‌ പൂല്ലാട്ട്‌ said...

ഹാ ഹാ ഇതൊരു രസികന്‍ രചന തന്നെ. കലക്കി ട്ടോ. നല്ല ശൈലി. ചിരിച്ചങ്ങൂറിചിരിച്ചുപോയി. ഇത്തരമൊന്നെങ്കിലും വായിക്കാന്‍ കിട്ടില്ലേല്‍ പോക്കായി പോവില്ലെ കാര്യം.

~nu~ said...

അടിപൊളി മാഷേ! അസ്സൽ കോമഡി! ഇനിയെങ്കിലും ആർത്തി പിടിച്ച് മോരും വെള്ളം കുടിക്കണ്ടാ... ഹി ഹി ഹി

ഓര്‍മ്മകള്‍ ഉണ്ടായിരിക്കേണം.... said...

ഉള്ളതു പറയാല്ലോ? വല്ല പനിയും തലവേദനയും വന്നാല്‍ മനുഷ്യനു ഒരിടത്ത് അടങ്ങിയിരിക്കാം. എന്നാല്‍ വയറിന്റെ കാര്യത്തില്‍ കത്രികപൂട്ട് തന്നെ ശരണം. ചിരിച്ചു ചിരിച്ചു മണ്ണ്‌ കപ്പി കേട്ടോ.........

sureshthannickelraghavan said...

സേനു, ഇനി മുത്തൂര്‍ കഴിഞ്ഞു ഹോട്ടല്‍ എലീട് വരെ വണ്ടി ഓടിക്കുമ്പോള്‍ സ്ടീരിംഗ് വീല്‍ കയ്യില്‍ നില്‍ക്കുമോന്നു സംശയമാനിഷ്ട്ടാ.........
ചിരിക്കാന്‍ വയ്യേ,അവതരണം അപാരം,
എന്റെ കെട്ടിയോള് വായിച്ചിട്ട് തലയ്ക്കു കയ്യും കൊടുത്തിരുന്നു ചിരിക്കുന്നു.
അടുത്തിടെ ഒരുബന്ദു വീട്ടിലെ സല്‍ക്കാരം കഴിഞ്ഞിട്ട് പോന്നപപോള്‍, കഷിക്കു ഇതേ അനുഭവം ഉണ്ടായി ,കോഴഞ്ചേരിയിലെ ഒരു ഹോസ്പിറ്റലിന്റെ, റെസ്റ്റ് റൂമില്‍ പോയി വിശ്രമിച്ചിട്ട് വന്നു, എന്നെ ദയനീയമായി നോക്കുന്നത് കണ്ടു !ഹ ഹ

Masrooh said...

അചച്ചനു പറ്റിയ പറ്റു എനിക്കും പട്ടിയ്ടുന്ദ് ഞാനും എന്‍റെ ഒരു കൂടുകര്നും ഒരു ദിവസം ഒരു ചെറിയ ഒരു പാര്‍ട്ടിയും കഴിഞ്ഞു വരമ്പോള്‍ എനിക്ക് നല്ല വണ്ണം 2inu മുട്ടി ഞാന്‍ ആ കാര്യം അവനോട് പറഞ്ഞപ്പോള്‍ അവന്‍ പറഞ്ഞു ഡാ എനിക്കും ആ ശങ്ക ഉണ്ടെന്നു
പിന്നെ ഒന്നും ആലോചിച്ചില്ല അടുത്തുള്ള ഹോട്ടല്‍ കയറി കാര്യം സാധിക്കാം എന്ന് കരുതി
എന്താണെന്നു അറയില്ല അവന്‍ പെട്ട്ടന്നു മെന്‍സ് ബാത്‌റൂമില്‍ കയറി പറ്റി എന്‍റെ അവസ്ഥ ഓര്‍ക്കാന്‍ വയ്യ , ഞാന്‍ പിന്നെ ഒന്നും ആലോചിച്ചില്ല രാത്രി അല്ലെ ആരും കാണില്ല എന്ന് കരുതി ലേഡി ബാത്‌റൂമില്‍ കയറി കാര്യം സാദിച്ചു ആരും കണ്ടില്ല എന്ന മട്ടില്‍ ഞാന്‍ വേഗം അവിടന്നു ഇറങ്ങി നടന്നു ബസ് സ്റ്റാന്‍ഡില്‍ എത്തിയപ്പോള്‍ എനിക്ക് തോന്നി ഒരു സോഡാ കുടിക്കാം എന്ന് കരുതി പാന്റ് തപ്പിയപ്പോള്‍ എന്‍റെ മണി പേഴ്സ് കാണുനില്ല, അപ്പോള്‍ ഞാന്‍ തിരിച്ച് ഓടി ആ ലേഡി ബത്ത്രൂമിലെക് അവിടെ ചെന്നപ്പോള്‍ അവിടയും ഇല്ല ആരും അറിയതെ കാര്യം സപ്പ്ലെരോദ് തിരക്കി ഒരു പേഴ്സ് കിട്ട്യൂ എന്ന്
വളരെ രഹസ്യമായ് ഞാന്‍ ചോദിച്ച ആ കാര്യം അവന്‍ അവന്റെ മുഴാവ്ന്‍ ശബ്ദവും എടുത്തു മാനേജരെ വിളിച്ചു അറയിച്ചു എല്ലാവരും ആ കാര്യം അര്നിഞ്ഞു അന്ന് ഞാന്‍ അവിടന്നു പേഴ്സ് വാങ്ങി ഓടിയ വാഴയില്‍ ഇനി ഒരു പാട് കാലം കഴിഞ്ഞു വല്ല റോഡും വന്നാല്‍ വന്നു

Unknown said...

ini allappyil vach ingane oru aavasyam vannal SD college kazhinjttu NH 47 Hotel Green park inn il poku avide 8 toilets und valare vruttiyullath.

hi said...

hhaaha kalakkan adipoli. :D

ആനക്കാട്ടില്‍ ചാക്കോച്ചി said...

ithu kollayirunnu mashe... officilirunnu chirikkan njan korachu kashtapettu...

saji Moham said...

ഗൂഗിളില്‍ 'തമാശകള്‍' എന്നടിച്ച്‌ സെര്‍ച്ച്‌ ചെയ്തത്‌ അലപം ചിരിക്കാനാണു. അങ്ങനെയാണു ഷൂട്ടിങ്ങ്‌ തമാശകള്‍ എന്റെ ശ്രദ്ധയില്‍ വന്നത്‌. വായിച്ചു. മനം നിറഞ്ഞ്‌ ചിരിച്ചു. ഒടുക്കം ഞാന്‍ കരുതി എന്നെ പോലെ ഈ ബ്ലോഗ്‌ മറ്റുള്ളവര്‍ക്കും ചിരിക്കാന്‍ വക നല്‍കാനായി ഞാന്‍ പഴമ്പുരാണംസ്‌ ഡെഡിക്കേറ്റ്‌ ചെയ്യുന്നു.

തമാശകള്‍ = www.pazhamburanams.blogspot.com

ചിരി സൈറ്റ്‌- www.pazhamburanams.blogspot.com

നിങ്ങളുടെ റ്റെന്‍ഷന്‍ മറന്ന് ചിരിക്കാന്‍, ഉല്ലസിക്കാന്‍ ഈ സൈറ്റ്‌ ഉപകരിക്കുമെന്ന് ഞാന്‍ ഗ്യാരണ്ടി. ഒരു ശ്രീനിവാസന്‍ സിനിമ പോലെ മനോഹരം.

സെനു ഈപ്പന്‍ തോമസിന്റെ പഴമ്പുരാണംസ്‌ തമാശകളുടെ ലോകം കീഴടക്കട്ടെയെന്ന് ആശംസിക്കുന്നു

Jacob John said...

നല്ല വരികൾ